02.06.2016
Այսօր Գերմանիայի խորհրդարանի ներքին պալատն ընդունել է Հայոց ցեղասպանությունը ճանաչող բանաձևը և 1915թ. Օսմանյան կայսրությունում հայերի կոտորածներն անվանել ցեղասպանություն: Բանաձևն ընդունվել է խոհրդարանականների քվեների բացարձակ մեծամասնությամբ՝ մեկ դեմով և մեկ ձեռնպահով:
Բանաձևը կրում է «Ի հիշատակ 101 տարի առաջ Օսմանյան կայսրությունում հայոց և այլ քրիստոնյա փոքրամասնությունների հանդեպ իրագործված ցեղասպանության» խորագիրը:
5 էջանոց բանաձևում նշվում է, որ. «Հայերի ճակատագիրը 20-րդ դարում տեղի ունեցած կոտորածի, էթնիկ զտման, տեղահանության ու ցեղասպանության օրինակ է»։
Բանաձևի նախագիծը մեկ ընթերցմամբ ընդունվել էր դեռ 2015-ի գարնանը, սակայն բուն հաստատումը հետաձգվել էր անորոշ ժամանակով՝ գերմանա-թուրքական հարաբերությունները չվատթարացնելու նպատակով:
Այս բանաձևը համատեղ կազմել և ներկայացրել են իշխող կոալիցիայի մաս կազմող Քրիստոնեա-դեմոկրատական (CDU) և Քրիստոնեա-սոցիալական միությունները (CSU), Սոցիալ-դեմոկրատական (SDP) և ընդդիմադիր Կանաչների կուսակցությունները:
