09.07.2014


Հուլիսի 8-ին՝ Արգենտինայի Հանրապետությունում պաշտոնական այցով գտնվող, ՀՀ Նախագահ Սերժ Սարգսյանը Բուենոս Այրես քաղաքային կառավարության նախարարների խորհրդի նախագահ Օռասիո Լառետայի, տեղական ինքնակառավարման մարմինների և արգենտինահայ համայնքի ներկայացուցիչների հետ ներկա է գտնվել Բուենոս Այրեսի Պալերմո թաղամասում Հայոց ցեղասպանության թանգարանի հիմնարկեքի արարողությանը: Հիմնարկեքի հուշատախտակի օրհնությունից հետո Բուենոս Այրեսի քաղաքային կառավարության նախարարների խորհրդի նախագահ Օռասիո Լառետան և ՀՀ Նախագահի աշխատակազմի ղեկավար Վիգեն Սարգսյանը բացել են այն: Հայոց ցեղասպանության թանգարանի հիմնարկեքի կապակցությամբ Նախագահն արարողության մասնակիցների առջև հանդես է եկել ելույթով:

«Այս թանգարանը ստեղծվում է՝ լրացնելու Հայոց Ցեղասպանությանը նվիրված այն բազմաթիվ հուշակոթողների շարքը, որ սփռված են արևելքից արևմուտք, հյուսիսից հարավ՝ որպես խոսուն վկա, որ որքան ժամանակ էլ անցնի, մենք հիշելու ենք ու պահանջելու: Մարդկային հիշողությունը պատմության յուրահատուկ մաղն է, որն առանձնահատուկ երախտագիտությամբ պահում է այն անուններն ու տեղանունները, որոնք մշտապես արդարության սերմեր են ցանում՝ առաջ մղելով համամարդկային ամենավեհ արժեքները»,-իր խոսքում նշել է ՀՀ Նախագահը։

Oրերս ՀՑԹԻ տնօրեն Հայկ Դեմոյանը նշել էր, որ նման հաստատություները պարտադիր են ոչ միայն հայ ժողովրդի, այլև միջազգային հանրության համար: «Հաջորդ տասնամյակում աշխարհի խոշորագույն մայրաքաղաքներում Հայոց ցեղասպանության թանգարանների բացումը պետք է լինի առաջնային և նախընտրելի ռազմավարական ուղղություն»,-նշել էր Դեմոյանը` հավելելով, որ. «Թանգարանը դաստիարակիչ առաքելություն կունենա հատկապես երիտասարդության շրջանում, քանի որ թանգարաններ այցելությունը կլինի նաև դպրոցականների ծրագրում և կունենա մեծ դերակատարում ոչ միայն ցեղասպանությունների մասին իրազեկման, այլև դրանց մերժման և դատապարտման գործում»:

Հիշեցնենք, որ Հայոց ցեղասպանության 100-րդ տարելիցին ընդառաջ, Բուենոս Այրեսի քաղաքային կառավարության 2014թ. մայիսի 6-ի որոշմամբ՝ մայրաքաղաքի Պալերմո թաղամասում անվճար տարածք է հատկացվել Հայոց ցեղասպանության թանգարանի կառուցման համար: Հունիսի 10-ին Արգենտինայում ՀՀ դեսպանության մասնակցությամբ և Հայ կենտրոնի ու Արգենտինայի Հայոց թեմի հովանու ներքո տեղի է ունեցել Հայոց ցեղասպանության թանգարանի կառուցման նպատակով Բուենոս Այրեսի քաղաքային իշխանությունների կողմից հատկացված հողատարածքի՝ իրավական փաստաթղթերը փոխանցելու պաշտոնական արարողությունը