09.10.2024
Էջմիածին քաղաքի հիմնադրման 2709-ամյակի միջոցառումներին մասնակցելու համար Հայաստան ժամանած Ռուսաստանի Դաշնության Նիժնի Նովգորոդի շրջանի Արզամաս քաղաքային շրջանի պատվիրակությունը վարչակազմի ղեկավարի առաջին տեղակալ Միխայիլ Գուսևի գլխավորությամբ հոկտեմբերի 9-ին այցելեց Հայոց ցեղասպանության հուշահամալիր:
Հյուրերին դիմավորեցին Հայոց ցեղասպանության թանգարան-ինստիտուտի թանգարանային աշխատանքների գծով փոխտնօրեն Լուսինե Աբրահամյանը և Ժաննա Մելքոնյանը: Վերջինս հյուրերին ուղեկցեց Հայոց ցեղասպանության հուշահամալիր՝ ներկայացնելով հուշահամալիրի ստեղծման պատմությունը: Անդրադարձ կատարվեց նաև Ծիծեռնակաբերդի տարածքում անցյալ դարավերջին Ադրբեջանի Սումգայիթ, Կիրովաբադ (Գանձակ), Բաքու քաղաքներում ադրբեջանական կառավարության կազմակերպած կոտորածներին զոհ գնացած հայերի հիշատակին տեղադրված երեք խաչքարերի և Արցախյան գոյամարտի տարիներին Հուշապատի դիմացի հատվածում հուղարկավորված հինգ ազատամարտիկների պատմություններին՝ շեշտելով կապը տեղի ունեցածի և Հայոց ցեղասպանության միջև:
Ռուսաստանից ժամանած հյուրերը ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության անմեղ զոհերի հիշատակը:
Պատվիրակության անդամները շրջեցին նաև Հայոց ցեղասպանության թանգարանում, ծանոթացան մշտական և ժամանակավոր ցուցադրություններին, որից հետո պատվիրակության ղեկավար Միխայիլ Գուսևը գրառում կատարեց Պատվավոր հյուրերի հուշամատյանում:
Շնորհակալություն հայտնելով այցի համար՝ ՀՑԹԻ թանգարանային աշխատանքների գծով փոխտնօրեն Լուսինե Աբրահամյանը պարոն Միխայիլ Գուսևին նվիրեց Հայոց ցեղասպանության մասին գրքեր:
