11.12.2019


Սույն թվականի դեկտեմբերի 3-5-ը ՀՑԹԻ գիտության գծով փոխտնօրեն, պ.գ.թ. Էդիտա Գզոյանը Վարշավայում (Լեհաստան) մասնակցեց Պիլեցկի ինստիտուտի կողմից կազմակերպված «The New Dawn of Europe after the Great War: the Theory of the State and Genocide in the 20th Century» խորագրով միջազգային գիտաժողովին:

Գիտաժողովին մասնակցում էին շուրջ 26 հետազոտողներ Լեհաստանից, Գերմանիայից, Իտալիայից, Ռուսաստանից, Ավստրալիայից, ԱՄՆ-ից, Հնդկաստանից, Հարավ-Աֆրիկյան Հանրապետությունից:

Էդիտա Գզոյանը հանդես եկավ «The Armenian Genocide and the Development of the Concepts of Crimes against Humanity and Genocide» վերնագրով զեկուցումով, որի ընթացքում ներկայացրեց Հայոց ցեղասպանության ազդեցությունը միջազգային իրավունքում մարդկության դեմ ուղղված հանցագործությունների և ցեղասպանության հանցագործության հայեցակարգերի զարգացման վրա: Բանախոսն իրավական տեսանկյունից ներկայացրեց 1915 թ. մայիսի 24-ի Դաշնակից տերությունների (Մեծ Բրիտանիա, Ֆրանսիա, Ռուսական կայսրություն) համատեղ հռչակագիրը, ապա նաև՝ Փարիզի խաղաղության համաժողովի շրջանակներում Պատերազմի պատասխանատուներին/հեղինակներին պատասխանատվության ենթարկելու և պատիժների իրագործման հանձնաժողովի աշխատանքները՝ կապված մարդկության դեմ ուղղված հանցագործությունների եզրույթի՝ հայերի դեմ առաջին համաշխարհային պատերազմի ժամանակ տեղի ունեցածի հանդեպ կիրառման և մեկնաբանման հետ:

Անդրադարձ կատարվեց մարդկության դեմ հանցագործությունների և ցեղասպանության հայեցակարգերի դրսևորումներին Ստամբուլի դատավարությունների ժամանակ, նաև՝ Սևրի դաշնագրի 230-րդ հոդվածին, որով նախատեսվում էր ստեղծել Միջազգային դատարան՝ Օսմանյան կայսրության տարածքում տեղի ունեցած կոտորածների պատասխանատուներին պատասխանատվության ենթարկելու համար:

Էդիտա Գզոյանը խոսեց նաև Ռաֆայել Լեմկինի կողմից «ցեղասպանություն» եզրույթի ստեղծման գործում Հայոց ցեղասպանության խաղացած դերի մասին:



ՀՑԹԻ արտաքին կապերի և լրատվության բաժին