Հոկտեմբերի 12-ին «Հայոց ցեղասպանության թանգարան-ինստիտուտ» հիմնադրամի գիտաժողովների սրահում տեղի ունեցավ հերթական մեթոդաբանական սեմինարը:

Դասախոսեց Կանադայի արքայական ռազմական քոլեջի պատվավոր պրոֆեսոր, ցեղասպանագետ Ալան Ուայթհորնը:

Ալան Ուայթհորնը հանդես եկավ երկու դասախոսությամբ՝ «Ցեղասպանության ու մարդու իրավունքների ընդհանուր պատմության համառոտ ակնարկ» և «Արվեստներ և ցեղասպանություն. Հոլոքոստի և Հայոց ցեղասպանության համեմատություն» թեմաներով:

ԲԱՆԱԽՈՍԻ ՄԱՍԻՆ - Ալան Ուայթհորնը Կանադայի արքայական ռազմական քոլեջի պատվավոր պրոֆեսոր է: Սովորել է Տորոնտոյի Յորքի համալսարանում՝ ստանալով քաղաքագիտության և պատմության բակալավրի աստիճան, ապա ուսումը շարունակել է Օտտավայի Քարլթոնի համալսարանում՝ ստանալով քաղաքագիտության մագիստրոսի և դոկտորի աստիճաններ:

1970-ականների կեսերին եղել է հայտնի պատմաբան Դեյվիդ Լուիսի հուշագրությունների ուսումնասիրության գծով տնօրենը: 1978-2011 թթ. եղել է Կանադայի արքայական ռազմական քոլեջի քաղաքագիտության դասախոս:

1990-ականների կեսերին պրոֆեսոր Ուայթհորնը Սայմոն Ֆրեյզերի անվան համալսարանում (Կանադա) առաջինն է ստանձնել Ջեյմս Շեյվեր Վուդվորթի անվան հումանիտար գիտությունների ամբիոնի վարիչի պաշտոնը: Ալան Ուայթհորնը նաև դասախոսել է Քուինզ համալսարանի տարբեր բաժիններում:

Որպես գիտնական՝ պրոֆեսոր Ուայթհորնը գրում է մի շարք թեմաների մասին, այդ թվում՝ ցեղասպանության, մարդու իրավունքների, քաղաքական կուսակցությունների և ընտրությունների: Որպես պոետ՝ նա ուսումնասիրում է ցեղասպանության հարցն ու դրա ազդեցությունը հայ-կանադական ինքնության վրա: 2011 թ. արժանացել է ՀՀ մշակույթի նախարարության ոսկե մեդալին, իսկ 2015 թ.՝ Հայաստանի գրողների միության ոսկե մեդալին:

Պրոֆեսորը շոշափելի ներդրում ունի Հայոց ցեղասպանության ճանաչման և տվյալ թեմայով կրթության տարածման գործում ոչ միայն Կանադայում, այլ նաև Կանադայի սահմաններից դուրս։

Ինչպես արդեն տեղեկացրել էինք, «Հայոց ցեղասպանության թանգարան-ինստիտուտ» հիմնադրամը 2019թ. փետրվարից մեկնարկել է հանրային դասախոսությունների՝ մեթոդաբանական սեմինարների շարք:


Նմանօրինակ միջոցառումների մասին տեղեկություններ կարող եք ստանալ ՀՑԹԻ հիմնադրամի հետևյալ էջերում՝



http://genocide-museum.am/arm/eventsAGMI.php

https://www.facebook.com/armeniangenocidemuseum/

#MethodologicalSeminarsatAGMI
#AGMIEvents
#AGMIPublicLectures
#AGMIEducationProgram