13.05.2022
Ս.թ. մայիսի 12-ին Հայոց ցեղասպանության թանգարան-ինստիտուտի գիտաժողովների սրահում տեղի ունեցավ Ուրուգվայի հայ համայնքի կողմից Հայոց ցեղասպանության թանգարան-ինստիտուտին Հայոց պատմության, Հայ Դատի և Հայոց ցեղասպանության մասին մի շարք կարևոր նյութերի՝ ազդագրերի, թռուցիկների, գրքերի հանձնման հանդիսավոր արարողությունը, որին մասնակցում էր նաև ՀՀ-ում Ուրուգվայի Արևելյան Հանրապետության դեսպան Էդուարդո Ռոսենբրոկը տիկնոջ հետ:
Ուրուգվայից ՀՑԹԻ հիմնադրամին հանձնված նյութերի նվիրատուներն էին ուրուգվայաբնակ մեր հայրենակիցներ Ահարոնյան-Պարասկևադիսի արխիվի տնօրեն տիկին Նաիրի Ահարոնյանը, պրոֆեսոր Էդուարդո Ալվարես Պեդրոսյանը, բժիշկ Կարլոս Կեցոյանը:
Բացման խոսքում ՀՑԹԻ տնօրեն Հարություն Մարությանը կարևորեց Ուրուգվայի դերը Հայ ժողովրդի համար որպես Հայոց ցեղասպանությունը ճանաչած առաջին պետություն՝ ավելացնելով.
«Ուրուգվայի կողմից Հայոց ցեղասպանության ճանաչումից հետո աշխարհի մի շարք խոշոր երկրներ հետևել են այս փոքր պետության մեծ քայլին՝ ընդունելով ցեղասպանությունը: Եվ այսօր Ուրուգվայի հայ համայնքի կողմից մեզ փոխանցված այս բոլոր նյութերը մեծ նշանակություն ունեն մեր թանգարանի համար»:
Այնուհետև ելույթ ունեցավ Ուրուգվայի դեսպան Էդուարդո Ռոսենբրոկը:
«Ուրուգվայը փոքր երկիր է, բայց ունի մեծ հայկական համայնք, որը շատ ակտիվ է և կարողացել է գերազանց ինտեգրվել Ուրուգվայի հասարակությանը: Այս տարին շատ կարևոր է Հայաստանին և Ուրուգվայի համար, քանի որ մայիսի 27-ին նշվում է երկու երկրների միջև դիվանագիտական հարաբերությունների հաստատման 30 ամյակը: Ուրուգվայի հայ համայնքի կողմից տրամադրված տպագրությունները, գրքերը, ազդագրերը կհարստացնեն Հայաստանի ազգային գրադարանը և Հայոց ցեղասպանության թանգարանը»,- իր խոսքում նշեց դեսպանը:
Պատմաբան Գևորգ Յազըճյանը, որը նախաձեռնել էր Ուրուգվայում տպագրված նյութերը Հայաստան տեղափոխելու գործընթացը, նշեց, որ կան պաստառներ որոնք հրատարակվել են Արգենտինայում, մեծ մասը Հայոց ցեղասպանության 50-րդ տարելիցի օրերին:
Միջոցառմանը ներկա էին ԿԳՄՍՆ սփյուռքի հետ կապերի բաժնի պետ Կարեն Մնացականյանը, ԵՊՀ պատմության ֆակուլտետի դեկան Էդիկ Մինասյանը, Հայաստանի Ազգային գրադարանի փոխտնօրեն Հայկանուշ Ղազարյանը, Սփյուռքի գործերի գլխավոր հանձնակատարի գրասենյակի ներկայացուցիչ Ավետիս Մուրադյանը, պատմաբաններ, ուսանողներ:
