18.09.2015
Պաշտոնական այցով Երևանում գտնվող Չեխիայի Հանրապետության խորհրդարանի Սենատի փոխնախագահ Զդենեկ Շկրոմախի գլխավորած պատվիրակությունը սեպտեմբերի 17-ին ՀՀ ԱԺ նախագահի տեղակալ Էդուարդ Շարմազանովի ուղեկցությամբ այցելել է Ծիծեռնակաբերդի Հայոց ցեղասպանության հուշահամալիր։
Չեխ խորհրդարանականները ծաղկեպսակ են դրել Մեծ եղեռնի հուշարձանին, ծաղիկներ խոնարհել անմար կրակի մոտ, լռությամբ ու խոնարհումով հարգել սուրբ նահատակների հիշատակը։
Պատվիրակության անդամները Հայոց ցեղասպանության թանգարան-ինստիտուտում ծանոթացել են Հայոց մեծ ողբերգության մասին պատմող փաստաթղթերին և ցուցանմուշներին, գրառում կատարել հուշամատյանում։
Չեխիայի Հանրապետության խորհրդարանի Սենատի փոխնախագահ Զդենեկ Շկրոմախը նշել է, որ հայերի նկատմամբ իրականացված եղեռնն իր բնույթով բավականին նման է հոլոքոստին, որը նույնպես ընդունվել է Չեխիայում։
«Իրականությանը պետք է նայել բաց աչքերով»,- ասել է Զդենեկ Շկրոմախը և հավելել, որ այսօր առավել ևս պետք է դասեր քաղել մեր պատմությունից, քանի որ տարբեր երկրներից դեպի Եվրոպա փախստականների մեծ հոսքը կոնֆլիկտների և պատերազմների հետևանք է։
