Մայիսի 19-ին՝ Հույների ցեղասպանության զոհերի հիշատակի օրը, Հայաստանի հունական համայնքների միությունը, Հայաստանում Հունաստանի դեսպանության ներկայացուցիչները, ինչպես նաև՝ «Հայոց ցեղասպանության թանգարան-ինստիտուտ» հիմնադրամի տնօրեն, պ.գ.դ. Հարություն Մարությանն ու ՀՑԹԻ Թանգարանային ցուցադրությունների կազմակերպման բաժնի աշխատակից, պ.գ.թ. Թեհմինե Մարտոյանը, Հայոց ցեղասպանության հուշահամալիրում հարգանքի տուրք մատուցեցին անմեղ զոհերի հիշատակին։
Ծաղկեպսակների և անմար կրակի շուրջը ծաղիկներ տեղադրելու արարողությունից հետո Հայաստանի հունական համայնքների միության նախագահ Մարիա Լազարևան հանդես եկավ հիշատակի ու զոհերի ոգեկոչման խոսքով։ Նրան հաջորդեցին դեսպանության, համայնքի ներկայացուցիչների, ապա՝ պարոն Հարություն Մարությանի և տիկին Թեհմինե Մարտոյանի ելույթները։
ՀՑԹԻ տնօրեն Հարություն Մարությանը կարևորեց հատկապես հայ և հույն ժողովուրդների դարավոր հարաբերությունները, անդրադարձավ Օսմանյան կայսրության ցեղասպան քաղաքականության զոհը դարձած երկու ժողովրդի պատմական անցյալին և ընդհանուր պայքարում համագործակցության հեռանկարներին։
Թեհմինե Մարտոյանը ներկայացրեց Հույների ցեղասպանության համապարփակ պատմությունը՝ Պոնտոսի հույն բնակչության նկատմամբ երիտթուրքական ծայրահեղ ազգայնամոլական դրսևորումները, ցեղասպանության փուլերը, բռնի իսլամացման օրինակները, Հույների ցեղասպանության ժխտման Թուրքիայի Հանրապետության թեզերը և այլն։
