21.04.2021
Ս. թ. ապրիլի 21-ին տեղի ունեցավ «Հայոց ցեղասպանության թանգարան-ինստիտուտ» հիմնադրամի տնօրենության ամենամյա հաշվետու մամուլի ասուլիսը:
Ասուլիսի ժամանակ ՀՑԹԻ տնօրեն Հարություն Մարությանը ներկայացրեց նախորդ տարվա ընթացքում թանգարան-ինստիտուտի գիտահետազոտական, գիտակրթական, գիտացուցադրական աշխատանքներն ու դրանց հիմնական արդյունքները:
ՀՑԹԻ միջազգային համագործակցության և նախորդ տարվա ընթացքում ՀՑԹԻ-ին արված նվիրատվությունների մասին խոսեց ՀՑԹԻ գիտական աշխատանքների գծով փոխտնօրեն Էդիտա Գզոյանը:
Թանգարանային աշխատանքների գծով փոխտնօրեն Լուսինե Աբրահամյանն անդրադարձավ Հայաստանից և արտերկրից թանգարան կատարած այցելություններին:
Ասուլիսին հաջորդեց
«Հայոց ցեղասպանությունը վերապրածների ընտանիքների հետքերով» խորագրով ժամանակավոր ցուցադրության բացումը: Ցուցադրությանը բացման խոսքով հանդես եկան «Հայոց ցեղասպանության թանգարան-ինստիտուտ» հիմնադրամի տնօրեն Հարություն Մարությանը և ՀՑԹԻ թանգարանային ցուցադրությունների կազմակերպման բաժնի վարիչ Սեդա Պարսամյանը: ՀՑԹԻ տնօրենն իր խոսքում կարևորեց Հայոց ցեղասպանությունը վերապրողների պատմությունները պարբերաբար վեր հանելու, տարբեր ուսումնասիրությունների կողքին նաև անհատական պատմությունների լուսաբանման կարևորության հարցը:
Ցուցադրության կազմակերպման համադրողը՝ Սեդա Պարսամյանը ցուցադրության կազմակերպումը հնարավոր դարձնելու համար շնորհակալություն հայտնեց վերապրածների ժառանգներին՝ իրենց ընտանեկան պատմություններով և փրկված-պահպանված մասունքներով կիսվելու համար:
Ցուցադրությունը երկլեզու է՝ հայերեն և անգլերեն: Տասնյոթ հիմնական խորագրերի և ուղեկցող բնօրինակ բացառիկ նյութերի (լուսանկարներ, ընտանեկան մասունքներ, փաստաթղթեր, ձեռագիր հուշեր և այլն) միջոցով ներկայացվում են Հայոց ցեղասպանությունը ծանր կորուստներով վերապրած երեք տասնյակից ավելի ընտանիքների, գերդաստանների պատմություններ: Ցուցադրության մեջ ներկայացվում են նաև հատվածներ Հայոց ցեղասպանությունը վերապրածների տեսաձայնագրություններից:
Միջոցառմանը ներկա էին ԱՄՆ-ից, Կիպրոսից, Արգենտինայից, Ֆրանսիայից և այլ երկրներից ժամանած, ինչպես նաև Հայաստանում հաստատված վերապրողների ժառանգները, ովքեր անձամբ ներկայացրեցին իրենց ընտանիքների պատմությունները: Ցուցադրության բացմանը զուգահեռ տեղի ունեցավ ներկայացվող ընտանիքներից մեկի՝ մալաթիացի Թևեքելյան ընտանիքի պատմությանը նվիրված գրքի շնորհանդեսը:
Միջոցառման ավարտին շնորհակալագրեր հանձնվեցին վերապրողների ժառանգներին:
Ցուցադրությունը կգործի մինչև սույն թվականի սեպտեմբերի 10-ը:
Մուտքն ազատ է:
ՀՑԹԻ արտաքին կապերի և լրատվության բաժին
