25.12.2014
Դեկտեմբեր 17-ին ՀՑԹԻ տնօրեն, Հայոց ցեղասպանության 100-ամյակի միջոցառումները համակարգող պետական հանձնաժողովի քարտուղար, պ.գ.դ. Հայկ Դեմոյանը մասնակցեց Բեռլինում կայացած «Եվրոպական ոգեկոչում 2014» միջազգային գիտաժողովին:
Գիտաժողովում «Հիշողության աշխարհագրական և քաղաքական ուղղությունները. Հայաստանի դեպքը» խորագրով մի նիստ նվիրված էր Հայոց ցեղասպանությանը: Գիտաժողովի պաշտոնական ծրագրում նշված էր. «2015 թվականին կնշվի Օսմանյան կայսրությունում հայ ժողովրդի նկատմամբ իրականացված կոտորածների 100 ամյակը, մի իրադարձություն, որը բևեռանում է հիշողության մեջ մինչ օրս: Այս հակամարտող հիշողությունները եվրոպացի քաղաքական և հասարակական գործիչների առաջ բարձրացնում են բարդ հարցեր: Հետևաբար, այս նիստի նպատակն է, հատուկ ուշադրություն հրավիրել ուսումնասիրելու, թե ինչպես են այդ դեպքերը հիշվում Եվրոպայում»:
Հայկ Դեմոյանը հանդես եկավ «Հայոց ցեղասպանությունը և Եվրոպայի պատմությունն ու հիշողությունը. համատեքստայնացման օգտագործումն ու չարաշահումը» զեկույցով, որը ներկայացնում էր հայկական խնդիրը Եվրոպայի պատմության և հիշողության մշակույթում:
Գիտաժողովը կազմակերպվել էր Միջազգային մշակութային կապերի ինստիտուտի և Գերմանիայի Արտաքին գործերի նախարարության համագործակցությամբ:
